Fámenni stendur Íslendingum fyrir þrifum – og meira nú í hinum flókna heimi nútímans en áður. Kröfur um sérþekkingu, bæði í einkageiranum og hjá hinu opinbera, hafa aukist mikið og fámenn þjóð á erfitt með að standa undir því.

Útlitið er ekki sérlega bjart, fjölgunin er nefnilega frekar hæg. Íslendingar væru náttúrlega fleiri ef svo margir hefðu ekki dáið úr farsóttum og harðræði eða flutt til Ameríku, en þá stóð landið ekki undir svo mörgu fólki.

Þetta horfir öðruvísi við nú. Fjölmennara Ísland væri hagkvæmara. Það eru of fáir skattborgarar.

Samkvæmt nýrri mannfjöldaspá Hagstofunnar verða Íslendingar ekki nema 446 þúsund árið 2065. Þá verð ég löngu dauður og sonur minn farinn að reskjast. Lífslíkur verða væntanlega meiri – sem þýðir að fjöldi gamals fólk eykst mikið. Margt mun breytast þegar baby boom kynslóðin dettur á gamalsaldurinn.

Mannfjöldaspáin gerir ráð fyrir að innflytjendum haldi áfram að fjölga, en brottfluttir Íslendingar verði fleiri en þeir sem flytja til landsins. Hagkerfi eins og okkar getur ekki án innflytjenda verið – og það verður raunin áfram.