Mig langar að minna á þessa tónleika sem eru í kvöld. Þeir eru haldnir til minningar um Ástu Stefánsdóttur sem fórst með vofveiflegum hætti í Bleiksárgljúfri í sumar. Ástu var saknað lengi og leitin að henni var fjarskalega erfið og sársaukafull. Með henni fórst vinkona hennar Pino Becerra Bolaños.

Tónleikarnir eru haldnir til að safna fé í svokallaðan Ástusjóð. Hann á að nota til að styrkja björgunarsveitir. Eins og mátti sjá í Kastljósi í gærkvöldi, þar sem kom fram Kolbeinn, bróðir Ástu, er hugmyndin að kaupa dróna sem hægt er að nota við leit og björgun. Það er afskaplega verðugt verkefni.

Það eru flottir listamenn sem koma fram á tónleikunum: Svavar Knútur, Byzantine Silhouette, Megas og Magga Stína, Árstíðir og Ragga Gröndal.

Ásta var glæsileg og gáfuð kona, lögfræðimenntuð, hafði áhuga á umhverfismálum, jafnrétti, menningu og listum. Hún var harmdauði fyrir marga.