Enn einu sinni rifjast upp lánið til Kaupþings sem veitt var í bankahruninu 2008. Þetta var fáum dögum áður en bankinn hrundi endanlega og lykilgagn í þessu er símtal milli Geirs Haarde forsætisráðherra og Davíðs Oddssonar seðlabankastjóra.

Það er algjörlega með ólíkindum að þetta símtal fáist ekki birt. Þarna var gjaldeyrisforða þjóðarinnar spilað burt – og tekið veð í banka og það í miðri bankakreppu.

Og nú er endanlega komið í ljós að megnið af þessum 500 milljónum evra tapaðist, en þegar fjármunirnir komust til Kaupþings hvarf hluti af þeim í einhverja hít, þeim var skotið undan eða jafnvel stolið. Eða hvað varð um peningana?

Þetta var ekki einkamál forsætisráðherrans og seðlabankastjórans, heldur opinber gjörningur sem varðar allan almenning. Það eru nákvæmlega engin rök fyrir því að birta ekki símtalið og engin skýring á því heldur nema að viðkomandi séu að reyna að verja orðspor sitt – sem er þegar verulega skaddað.

En ríkið er ekki til fyrir þá og er ekki í þeirra eigu – heldur okkar allra sem byggjum þetta land.