Forsíða nýjasta heftis Charlie Hebdo, þessa sem selst í milljónaupplagi, er frekar indæl mynd af fígúru sem á væntanlega að vera spámaðurinn Múhammeð.
Maðurinn, með tár í auga, heldur á spjaldi þar sem stendur „Ég er Charlie“.
„Allt er fyrirgefið,“ er yfirskriftin.
Þetta eru afskaplega góð skilaboð í ljósi atburðanna í síðustu viku.
En svo eru alltaf einhverjir sem vilja móðgast. Í þetta sinn eru það klerkarnir í Íran, Talibanar, herforingjastjórnin í Egyptalandi og Erdogan forseti Tyrklands. Kemur svosem ekki á óvart. Fleiri eiga sjálfsagt eftir að bætast í þetta ófélega kompaní.
Það liggur við að maður segi, eins og vini mínum Degi Sigurðarsyni var tamt – gott á pakkið!
