Frekar er nú dapurt að enginn íslenskur ráðamaður skuli hafa farið í samstöðugönguna miklu í París – sérstaklega í ljósi þessa að þar voru til dæmis allir forsætisráðherrar Norðurlandanna, Angela Merkel og David Cameron.

Og ótal aðrir leiðtogar. Einhvern veginn tókst þeim að komast til Parísar.

Maður skyldi halda að einhverjum íslenskum stjórnmálamanni hefði þótt forvitnilegt að fara og vera í þessum hópi og taka þátt í þessari kröftugu samstöðu. Langaði þá ekkert að fara?

Í staðinn var fulltrúi Íslands Nína Björk Jónsdóttir. Hún er sendiráðunautur í París – semsagt ekki einu sinni sendiherra.

Auðvitað voru fleiri Íslendingar í göngunni. Ég veit að vinir mínir Eyþór Gunnarsson og Ellen Kristjánsdóttir voru þar.

Þau eru reyndar afskaplega góðir fulltrúar lands og þjóðar – gerast varla betri.

Francois Hollande og Angela Merkel í París í gær.