Einkarekstur hefur alltaf verið stundaður í heilbrigðisþjónustu á Íslandi og einatt gefist ágætlega. Í þeim tilvikum er hið opinbera greiðandi þjónustunnar þannig að ekki er misskipting hvað varðar aðgang.

En það er afskaplega lítill áhugi fyrir einkavæðingu heilbrigðisþjónustu á Íslandi. Fullyrða má að þorri þjóðarinnar sé þvert á móti slíku.

Ásdís Halla Bragadóttir rekur fyrirtæki sem starfar á sviði heilbrigðisþjónustu. Hún hélt ræðu hjá Samtökum atvinnulífsins og fullyrti þar að Albanía væri „ljósárum á undan í samkeppni í heilbrigðisþjónustu“.

Viðskiptablaðið hefur þetta eftir Ásdísi Höllu:

Ásdís sagði að aðeins væri hægt að velja ríkispakkann þegar kæmi að tiltekinni þjónustu á Íslandi. Í Albaníu væri val milli hefðbundna pakkans, silfurpakkans og gullpakkans þegar ákveðið væri hvaða þjónustu foreldrar vildu fá vegna fæðingar.

Hér má bæta því við að á síðasta ári var smábarnadauði 2 af 1000 fæddum börnum á Íslandi en í Albaníu var talan 13 af 1000.