Augljós megintilgangur blekkingarfléttu Ólafs Ólafssonar var að leyna raunverulegu eignarhaldi á hlut Eglu hf. í Búnaðarbankanum. Þetta sagði Kjartan Bjarni Björgvinsson formaður Rannsóknarnefndar Alþingis á blaðamannafundinum vegna skýrslunnar um þátt þýska bankans Hauck & Aufhäuser í einkavæðingu Búnaðarbankans. Segir Kjartan Bjarni að allir þræðir fléttunnar hafi verið í höndum Ólafs Ólafssonar. Aðspurður um tilganginn með fléttunni sagði Kjartan Bjarni:

Augljóslega var einn megintilgangurinn að leyna raunverulegu eignarhaldi á hlut Eglu hf. í Búnaðarbankanum. Það er augljóst að mönnum hefur verið mikið í mun að það kæmi ekki fram að Kaupþing kæmi þar nærri, að Ólafur Ólafsson kæmi þar með meiri hætti fram en opinberlega hafði verið kunngjört. Og við sjáum það t.d. í öllum þeim tölvupóstum sem við höfum aflað að það er lögð rík áhersla á það að leynd ríki um þessi samskipti og öðrum en þröngum hópi manna verði ekki kunnugt um það.

Kjartan sagði það ekki umfjöllunarefni nefndarinnar að kanna hvort refsiverð brot hafi verið framin, sagði hann að Alþingi þurfi að skipa þriggja manna nefnd til að kanna það. Aðspurður hvort hægt sé að gera sér í hugarlund hvers vegna farið var í þessa fléttu segir Kjartan Bjarni:

Sennilega vegna þess að þeim hefur þótt óþægilegt að þetta spyrðist út. En ég held að þeir séu betur til þess fallnir að svara þeirri spurningu en ég.