Vilhjálmur Birgisson, formaður Verkalýðsfélags Akraness fjallar um Landsvirkjun í nýjasta pistli sínum á Pressuna. Hann telur það löngu orðið tímabært að stjórnvöld hér á landi marki eigendastefnu fyrir þetta gríðarstóra ríkisfyrirtæki. Umræðan um sæstreng héðan til Skotlands til að selja þangað rafmagn hefur verið áberandi undanfarin misseri og vill Vilhjálmur að kannað verði hve miklum fjármunum Landsvirkjun, sem er í eigu þjóðarinnar, hafi eytt í að kanna þann möguleika að leggja jarðstreng.

Að marka eigendastefnu segir Vilhjálmur að sé algjört lágmark og hann er ekki sannfærður um það að ríkur stuðningur sé meðal almennings og stjórnvalda við að leggja slíkan sæstreng sem myndi ef marka má orð sérfræðinga, leiða til hærra raforkuverðs fyrir íslensk heimili og fyrirtæki.

Það er mitt mat að afar brýnt sé að marka þessa eigendastefnu, því er það t.d. eðlilegt að síldarbræðslurnar sem sumar hverjar höfðu ráðist í fjárfrekar breytingar á sínum búnaði til að geta notað raforku sem orkugjafa, sjái sér nú ekki fært að keyra verksmiðjunnar á raforku af þeirri ástæðu að orkuverð Landsvirkjunar er svo hátt að það er hagkvæmara að keyra þær áfram með mengandi orkugjafa sem er olía.

Að hér á landi sé framleidd og notuð vistvæn orka er eitthvað sem allir geti sammælst um segir Vilhjálmur enn fremur. Það sé því undarlegt að síldarbræðslur noti frekar mengandi olíu til að knýja bræðsluna en vistvæna orku frá Landsvirkjun vegna verðmunar.

Því skora ég á Alþingi að móta sér tafarlaust eigendastefnu fyrir Landsvirkjun þar sem hagsmunir heimila, fyrirtækja og atvinnuöryggis verði höfð að leiðarljósi!