Guðni Th. Jóhannesson forseti Íslands vill að ákvæði um landsdóm verði fellt úr stjórnarskrá lýðveldisins, segir hann dóminn ekkert erindi eiga í stjórnarskrána. Þetta kemur fram í viðtali sem birt er í tíma­riti Lög­réttu og greint er frá í Morgunblaðinu í dag. Segir forseti Íslands það hafa sýnt sig að niðurstaða landsdóms hafi frekar sundrað en sameinað þjóðina og það á versta tíma:

Ég sagði það áður en ég tók við emb­ætti for­seta Íslands og segi það enn að í end­ur­reisn­ar­starf­inu eftir hrun var feigð­ar­flan að nýta forn og úrelt ákvæði um lands­dóm,

sagði Guðni. Telur hann að niðurstaða landsdóms, þegar hann var kallaður saman í máli Geirs H. Haarde fyrrverandi forsætisráðherra, hafi ekki verið í samræmi við þá stefnu að þeir sem bæru pólitíska ábyrgð myndu axla hana og taka afleiðingunum:

„Látum þetta okkur að kenn­ingu verða enda hygg ég að eng­inn vilji hafa ákvæði um lands­dóm í stjórn­ar­skránni. Finnið þann sem vill að málum verði hagað með sama hætti í fram­tíð­inni. Ég efast um að ykkur tak­ist það.“

Í viðtalinu sagði Guðni einnig að þjóðin telji ekki skynsamlegt að forseti Íslands sé einn með það vald að geta synjað lögum, það sé vilji þjóðarinnar að ákvæði sé í stjórnarskrá um að ákveðinn fjöldi kjósenda geti krafist þjóðaratkvæðagreiðslu með undirskriftum.