Brestir eru komnir í samstarf stjórnarflokkanna. Einkum eru það þingmenn Viðreisnar sem óánægðir eru með framgöngu sumra þingmanna Sjálfstæðisflokks. Þetta kemur fram í helgarblaði DV og herma heimildir blaðsins að „verulegs pirrings sé farið að gæta“. Það er þó ekki einungis í garð þessara ákveðnu þingmanna heldur einnig að formanni Sjálfstæðisflokksins, Bjarna Benediktssyni.
Bjarni hefur haft léleg tök á sínum þingmönnum og verið mikið fjarverandi að sögn heimildarmanna DV. Ákveðnir þingmenn flokks hans hafa verið duglegir að senda samstarfsflokkunum pillur í fjölmiðlum sem Hanna Kristin Friðriksson, þingflokksformaður Viðreisnar og þingmaður Reykjavíkurkjördæmis suður segir „þreytandi“.
Samstarf þeirra þriggja flokka sem nú mynda ríkisstjórn, Sjálfstæðisflokks, Viðreisnar og Bjartrar framtíðar hefur gengið upp og ofan en síðan stjórnin hóf störf þann 11. janúar síðastliðinn. Meirihlutinn er veikur, aðeins einn þingmaður og hafa einhverjir þingmenn Sjálfstæðisflokks frá upphafi haft efasemdir um skynsemi þessa samstarfs.
Þingmenn Sjálfstæðisflokks hafa sumir hverjir sett sig upp á móti stjórnarmálum sem nefnd eru í stjórnarsáttmálanum, til að mynda frumvarpi Þorsteins Víglundssonar, félags- og jafnréttismálaráðherra um jafnlaunavottun og fjármálaáætlunar til fimm ára.
