Skemmtikrafturinn Margrét Erla Maack segir að um helming allra skipta sem hún komi fram feli í sér dónaskap eða kynferðislegt áreiti gesta. Í pistli sem hún birtir á Kjarnanum fjallar hún um ummæli Sölku Sólar sem vakið hafa mikla athygli þar sem hún ávarpaði ónefndan veislugest sem klipið hafði í rassinn á henni rétt áður en hún steig á svið. „Þegar fréttin um Sölku fór á flug hlógum við mamma,“ segir Margét.

„Hvernig ætli það verði dílað við þetta? Ætli hún fái samskonar símtal og þú, Margrét mín?“

Margrét rifjar upp atvik sem hún hefur skrifað um áður en hún varð fyrir áreitni þegar hún var að skemmta hjá sama fyrirtæki og Salka Sól. Fyrirtækið var ekki lengi að bregðast við þó viðbrögðin hafi verið önnur en Margrét bjóst við.

„Ekki leið á löngu þar til ég fékk sítal frá fyrirtækinu, þungbúin rödd tjáði mér að svona ætti manneskja sem ráðin væri ekki að hafa sér og ég var sko sammála því,“ segir hún.

„En það var ekki verið að tala um hann, ó nei, það var verið að tala um mig. Að ég ætti ekki að tjá mig um þetta, að ég ætti að taka þetta út af blogginu og að ég yrði sko aldrei ráðin aftur af fyrirtækinu.“

Margrét segir móður sína hafa starfað hjá fyrirtækinu á þessum tíma og hún hafi einnig fengið skammir fyrir ummæli dóttur sinnar. Maðurinn sem Margrét skrifaði um var að hennar sögn þekktur fyrir óviðeigandi hegðun í veislum en alltaf var honum boðið – og hann starfar enn hjá fyrirtækinu.

„Viðbjóðurinn sem hann slefaði í eyrað á mér, um mig, mömmu mína, flugfreyjubúninga og fleira situr enn þá í mér.“

Hún segir það eðlilegan hluta af bransanum að fást við fólk undir áhrifum áfengis. „Verst er þegar allir þekkja hegðunarmynstur erfiðu manneskjunnar, en bjóða henni samt, og enginn gerir neitt,“ segir hún.

„Ef þetta gerist ítrekað, og allir vita af áhættunni sem skapast þegar erfiðleikagrísirnir sletta úr klaufunum þá ættum við að hætta að bjóða þessu fólki. Þau geta bara halt sitt eigið partý. Pant ekki skemmta í því.“