Cristiano Ronaldo, sóknarmaður Real Madrid vann sinn fimmta Gullknött á dögunum og jafnaði þar með Lionel Messi, sóknarmann Barcelona.

Þeir hafa einokað verðlaunin undanfarin áratug en margir knattspyrnumenn hafa blandað sér í umræðuna um þá kappa og sagt sína skoðun.

Pele, einn besti leikmaður sögunnar hefur nú tjáð sig um muninn á þeim tveimur en hann varð þrívegis Heimsmeistari með Brasilíu.

„Það er sorglegt að staðan í dag sé þannig að það er bara hægt að velja á milli tveggja leikmanna,“ sagði Pele.

„Johann Cruyff, Diego Maradona, Pele, Zico, Junior. Ef við horfum á alla heimsbyggðina í dag erum við með tvo leikmenn, Neymar nálgast þá en hann er ekki alveg kominn þangað ennþá.“

„Messi er betri að mínu mati. Það er mikilvægt að skora mörk, það er rétt en ef það er enginn til þess að búa til fyrir þig þá er ekki nóg að geta bara skorað. Ég myndi velja Messi í mitt lið.“

„Ronaldo er frábær markaskorari og hann skorar alltaf sín mörk. Messi býr til mörk, stjórnar sóknarleiknum og skorar líka.“

„Eins frábær og Ronaldo er þá er Messi meiri alhliða leikmaður og því er hann betri, á því leikur enginn vafi,“ sagði Pele að lokum.