United staðfestir komu Mourinho: „Jose er einfaldlega besti stjórinn í boltanum í dag“

Manchester United hefur staðfest að Jose Mourinho hafi verið ráðinn sem knattspyrnustjóri félagsins. Þetta hefur lengi legið fyrir en opinber staðfesting kom ekki fyrr en í morgun.

Mourinho, sem er 53 ára, skrifaði undir þriggja ára samning við félagið en hann var rekinn frá Chelsea í desember í fyrra eftir dapurt gengi. Hann hefur unnið fjóra deildarmeistaratitla á ferli sínum; með Porto í Portúgal, Chelsea á Englandi, Inter á Ítalíu og Real Madrid á Spáni. Þá hefur hann unnið Meistaradeildina tvisvar, fyrst með Porto og svo með Inter.

„Jose er einfaldlega besti stjórinn í boltanum í dag. Hann hefur unnið titla og verið öðrum hvatning,“ sagði Ed Woodward, stjórnarformaður United, í yfirlýsingu á vef félagsins.

Jose Mourinho segir það mikinn heiður að vera kominn til United. „Að verða þjálfari Manchester United er mikill heiður. Þetta er félag sem er þekkt og dáð um allan heim. Félagið er sveipað rómantík sem ekkert annað félag getur státar af.“