Tvær búðir fyrirhugaðar; í miðbænum og Smáralind – Vörumerkin H&M, Cos og & Other Stories verða í boði
Samkvæmt traustum heimildum DV hófust formlegar viðræður milli Regins fasteignafélags og sænska risans H&M Hennes & Mauritz AB í síðustu viku. Óformlegar viðræður hafa átt sér stað í tæpt ár en báðir aðilar hafa þvertekið fyrir að staðfesta slíkar fréttir. Samkvæmt heimildum DV er málið nú komið á það stig að hægt sé að slá því föstu að verslunarrisinn muni opna verslanir á höfuðborgarsvæðinu. Leigusamningar séu klárir en aðeins eigi eftir að ganga frá nokkrum smáatriðum. Heimildir DV herma að tvær verslanir H&M verði opnaðar hérlendis, önnur á jarðhæð svokallaðs Hafnartorgs, sem mun rísa árið 2018 og hin í Smáralindinni. DV hefur ekki upplýsingar um hvenær ráðgert er að opna verslunina í Kópavogi. Ásamt vörumerkinu H&M munu verslunarrýmin tvö hýsa vörumerkin Cos og & Other Stories sem einnig eru í eigu móðurfyrirtækisins H&M Hennes & Mauritz AB. Í samtali við DV neitaði Helgi S. Gunnarsson, forstjóri Regins fasteignafélags, að tjá sig um málið.
Um margra ára skeið hefur verið hávær orðrómur um yfirvofandi komu sænska fataveldisins H&M inn á íslenskan markað. Fjölmiðlar hafa reglulega birt fréttir um meintan áhuga fyrirtækisins á opnun verslananna hérlendis. Áhugi Íslendinga á fatakeðjunni hefur einnig verið notaður sem tilefni til hrekks og listgjörnings í gegnum tíðina. Árið 2011 fullyrti miðborgarstjórinn Jakob Frímann Magnússon, í viðtali við Fréttablaðið að fulltrúar H&M hefðu verið í sambandi við hann varðandi upplýsingar um verslunarhúsnæði í miðborginni og að til greina kæmi að opna tvær verslanir hérlendis, í Kringlunni eða Smáralindinni og í húsnæði við Laugaveg 89 þar sem verslunin Sautján var áður. Þá stóðu nemar í Listaháskólanum fyrir gjörningi sem vakti nokkra athygli í byrjun árs 2012. Nemarnir komu fyrir auglýsingarborða í glugga áðurnefnds húss við Laugaveg, þar sem fyrirhuguð opnun H&M og Urban Outfitters var auglýst.
Í lok október 2014 var hávær orðrómur um að H&M myndi opna verslun í Smáralind eftir áramót en framkvæmdastjóri Smáralindar bar þann orðróm til baka í frétt DV um málið. Hann viðurkenndi þó að eigendur Smáralindar væru mjög áhugsamir um að fá sænska risann inn í verslunarmiðstöðina og hefðu verið í viðræðum við fyrirtækið vegna þess. Ekkert hefði þó enn komið út úr þeim viðræðum. Í ágúst í fyrra fór Facebook-leikur í loftið þar sem auglýst var að H&M myndi opna verslun hér á landi þann 1. desember sama ár og að möguleiki væri að vinna sér inn 35.000 króna gjafabréf með því að líka við tiltekna síðu. Um þúsund Íslendingar létu glepjast þar til að í ljós kom að um hrekk var að ræða.
Í síðustu viku hafði Morgunblaðið eftir Bolla Kristinssyni, jafnan kenndum við Sautján, að verslunarkeðjan hefði engan áhuga á verslunarrekstri hérlendis enda sýndu tölur um eyðslu Íslendinga í H&M-búðum erlendis að markaðshlutdeild fyrirtækisins á íslenskum markaði væri talsverð. „Til hvers að vera eyða peningum í að koma til Íslands þegar þeir fá þetta bara í hinum búðunum,“ sagði Bolli en var ekki fyrr búinn að sleppa orðinu er formlegar viðræður Regins og H&M-veldisins hófust.
