Áróðursmyndband tengt Miðflokknum, sem birt var á samfélagsmiðlum, hefur vakið nokkra umræðu og gagnrýni. Höfundi myndbandsins hefur annars vegar verið borin á brýn óhófleg og einfeldningsleg fortíðardýrkun og hins vegar hefur hann verið gagnrýndur fyrir að nota myndefni og tónlist án leyfis höfunda. Undir myndbandinu er spilað lagið „Stingum af“ eftir Mugison, en hann hefur gert athugasemdir við notkunina á tónlist hans í þessum tilgangi og spurt hvort hún sé lögleg.

Einar Guðnason, formaður Miðflokksdeildar Kópavogs og varaþingmaður Miðflokksins, birtir grein á Vísir.is, þar sem þar sem hann tekur undir með boðskap myndbandsins. Dregur hann upp dökka mynd af Íslandi sem heimkynni ungs fólks og segir ekki að undra að unga fólkið vilji „stinga af“. „Á árunum 2022–2024 voru 1315 brottfluttir umfram aðflutta í þessum aldurshópi ungra Íslendinga. 1315 fleiri sem fluttu úr landi en þeir sem fluttu aftur heim. Þetta er stórt vandamál,“ skrifar Einar.

Hann segir ennfremur um ástandið á landinu eins og það blasir við ungu fólki:

„Skortur á leikskólaplássum, grunnskólavandi, ópraktískt fæðingarorlofskerfi, úrræðaskortur fyrir börn með fjölþættan vanda, biðlistar, bólginn húsnæðismarkaður, verðbólga, vextir, samgöngumál — ég gæti haldið áfram.“

Einar segir forgangsröðun stjórnvalda brenglaða: „Við setjum tugi milljarða króna í flóttamannaaðstoð og á meðan þurfa íslenskar mæður að fara með syni sína til Suður-Afríku á eigin kostnað til þess að þeir geti fengið aðstoð við fíknivanda. Við skuldbindum framtíðarkynslóðir til að borga hundruði milljarða króna í loftslagsmál sem þau geta lítið gert til þess að leysa og á meðan lengjast biðlistar í heilbrigðiskerfinu og námsárangur versnar. Við byggjum hagkerfið á óheftu innfluttu vinnuafli og á meðan bólgnar húsnæðisverð út og ungt fólk á sér enga von í að eignast húsnæði fyrir fertugt.“

Einar segir að leiðin til að fá ungt fólk heim og til að hætta að stinga sé að breyta forgangsröðinni og setja Ísland í forgang. Greinina má lesa hér.