Gunnar Gíslason lögmaður hefur sent Línu Ágústsdóttir, saksóknara hjá Lögreglustjóranum á höfuðborgarsvæðinu, kröfubréf, þar sem hann sakar hana um ærumeiðandi aðdróttun, krefst afsökunarbeiðni og miskabóta, og hótar henni málshöfðun.
Gunnar hefur verið í fréttum eftir að hann var úrskurðaður í gæsluvarðhald og sætti einangrun í Fangelsinu Hólmsheiði vegna rannsóknar Lögreglunnar á Norðurlandi eystra á stórri fíknefnaræktun á Raufarhöfn. Hann var síðan látinn laus og hefur verið opinskár um málið í fjölmiðlum. Segir hann ásakanir lögreglu gegn sér vera fjarstæðukenndar. Tekið skal fram að þetta mál er því máli að öllu leyti óskylt.
Krafan á hendur Línu varðar ummæli sem hún viðhafði í máli sem Gunnar rak fyrir hönd grísks skjólstæðings síns þar sem hann krafðist afléttingar á tilkynningaskyldu. Hafði manninum verði gert að tilkynna sig á lögreglustöð daglega í fjórar vikur og vildi hann ekki una því. Lína Ágústsdóttir gætti hagsmuna varnaraðila í málinu, Lögreglustjórans á höfuðborgarsvæðinu. Um var að ræða svokallað rannsóknarmál og var þinghald lokað.
Gunnar heldur því fram að Lína hafi dróttað að því að hann hefði falsað umboð skjólstæðings síns til að reka málið. Gunnar segir í kröfubréfinu að þetta sé aðdróttun um refsivert athæfi og sé ærumeiðandi: „Ummælin fela í sér ásökun um refsiverða háttsemi og eru til þess fallin að meiða æru og persónu undrirritaðs. Skiptir engu máli að ummælin hafi verið viðhöfð í lokuðu þinghaldi, en talsverðu máli skiptir að þau voru höfð uppi gegn starfandi lögmanni í tengslum við störf hans og brjóta í bága við siðareglur ákærenda, sem gerir ummælin alvarlegri en ella.“
Gunnar krefst þess að fá formlega og skriflega afsökunarbeiðni frá Línu. Einnig krefst hann þess að hún dragi ummælin til baka og greiði honum 600 þúsund krónur í miskabætur. Veitir hann frest til 2. janúar til að verða við kröfunum. Ella verði höfðað dómsmál.
Í lok kröfubréfsins skrifar Gunnar: „Vakin er athygli á því að ofangreind háttsemi þín verður tilkynnt yfirmönnum þínum hjá LRH, auk þess sem hún verður formlega kærð til Ríkissaksóknara von bráðar.“
