Á höfuðborgarsvæðinu tekur gul viðvörun gildi klukkan 11. Gera má ráð fyrir suðaustan 13-18 metrum á sekúndu, rigningu og snörpum vindhviðum, einkum í efri byggðum. Er fólk hvatt til að sýna aðgát og ganga frá lausum munum til að forðast tjón. Viðvörunin er í gildi til klukkan 16 í dag.
Í hugleiðingum veðurfræðings á vef Veðurstofu Íslands kemur fram að vindurinn um eða eftir hádegið sé nægur til að garðhúsgögn, trampólín og aðrir lausir muni geti fokið.
„Heilt yfir er um að ræða hvassasta vindinn sem komið hefur í mánuði og því er um að gera að ganga frá lausamunum sem enn eru úti eftir sumarið svo þeir fjúki ekki,“ segir veðurfræðingur. Seint í dag dregur smám saman úr rigningunni og í kvöld fer svo að draga úr vindi. Þrátt fyrir leiðindaveður verður þokkalega milt, eða 10 til 16 stig.
Á morgun verður veðrið öllu skaplegra en gera má ráð fyrir dálítilli vætu á vestanverðu landinu, en lengst af verður þurrt austanlands. Hiti verður 10 til 15 stig.
Á sunnudag gera spár ráð fyrir hægum suðlægum áttum. Bjart að mestu, en smáskúrir sunnan- og vestanlands. Hiti 8 til 13 stig. Það fer svo að hvessa um kvöldið og á mánudag er gert ráð fyrir suðaustan hvassviðri með rigningu.
Á laugardag:
Suðvestan og vestan 5-13 m/s og skúrir, en lengst af þurrt á austanverðu landinu. Hiti 7 til 14 stig, hlýjast á Austurlandi.
Á sunnudag:
Suðlæg átt 3-8 og bjartviðri, en 8-13 og stöku skúrir við suður- og vesturströndina. Vaxandi suðaustanátt um kvöldið. Hiti 7 til 12 stig.
Á mánudag:
Suðaustan 13-20 og talsverð rigning, en 8-13 og þurrt á norðaustanverðu landinu. Hægari og úrkomuminna um kvöldið. Hiti 8 til 14 stig, hlýjast á Norðausturlandi.
Á þriðjudag:
Sunnan 5-10 og skúrir eða rigning, en bjartviðri á Norður- og Austurlandi fram á kvöld. Hiti breytist lítið.
Á miðvikudag:
Breytileg átt og rigning víða um land. Hiti 6 til 11 stig.
Á fimmtudag:
Útlit fyrir breytilega átt. Rigning eða skúrir í flestum landshlutum. Hiti breytist lítið.
