Sarah birti fallega færslu um helgina sem hún tileinkaði dóttur sinni, Charlotte, sem fagnaði 16 ára afmælinu sínu.
„Fyrir 16 árum í dag gerðir þú mig að móður […] Þú ert sterk, þú ert hvetjandi, þú ert góð, þú ert fyndin,“ sagði hún meðal annars og birti myndir af Charlotte frá því að hún var lítil.
„Það mikilvægasta er að þú ert einstök – sú besta af öllum. Ég er svo heppin að fá að kalla þig bestu vinkonu mína.”
Sarah deildi einnig myndum af afmælisgjöfinni, sem var glænýr svartur Jeep Wrangler með risastórri rauðri slaufu framan á. Slíkir bílar eru ekki ókeypis og kosta á annan tug milljóna króna. Fylgjendur leikkonunnar, sumir að minnsta kosti, gagnrýndu hana fyrir að ofdekra stúlkuna.
„Sarah, þú ert falleg og góð og hefur ekki elst neitt, en ég er sammála þeim sem segja að þetta sé taktlaus færsla. Það er betra að halda sumu fyrir sjálfan sig. 16 ára börn eiga ekki að fá nýjan bíl – þau þurfa að læra gildi vinnu og að afla sér eigin tekna, óháð því hvaðan þau koma eða hverjir foreldrar þeirra eru.“
Annar bætti við: „Hver í ósköpunum kaupir bíl handa 16 ára barni? Ég fékk köku. Það er allt sem maður þarf.“
Þriðji sagði: „Hvílík skömm. Við elskum öll að dekra við börnin okkar en í alvöru, hvað ertu að kenna barninu þínu? Mér var kennt strax að erfiði borgar sig.”
Aðrir vörðu þó Söruh með kjafti og klóm og sagði til dæmis einn: „OMG! Af hverju eru svona margir að missa sig yfir því að foreldrar kaupi bíl fyrir barnið sitt? Þegar ég varð 16 ára fékk ég glænýjan bíl – en ég þurfti líka að vinna og kaupa bensínið sjálf. Í alvöru, þetta er ekki okkar mál. Óskið barninu til hamingju með afmælið og haldið svo áfram með daginn ykkar. Þetta er alls ekki svona alvarlegt.“
Sarah Michelle er sem kunnugt er gift leikaranum Freddie Prinze Jr. en þau gengu í hjónaband árið 2002. Auk Charlotte eiga þau soninn Rocky sem fæddist árið 2012.
