Á mánudag í síðustu viku fannst Fujiyoshi Shindo, 91 árs, látinn á heimili sínu í Akita í Japan. Eiginkona hans kom að honum látnum í svefnherbergi á fyrstu hæð heimilis þeirra. Talið var að bjarndýr hefði orðið honum að bana.

Sonur hans, Fyjiyuki Shindo, var síðan handtekinn á miðvikudaginn, grunaður um að hafa orðið föður sínum að bana. Japan Times segir að við krufningu hafi komið í ljós að áverkar á líkinu voru eftir hnífsstungur en ekki árás bjarndýrs.

Lögreglan hafði áður varað íbúa á svæðinu við bjarndýri og hvatt þá til að sýna árvekni. Sú viðvörun hefur nú verið afturkölluð.

The Independent segir að lögreglan hafi lagt hald á fjölda hnífa á heimilinu og verið sé að rannsaka hvort einhver þeirra hafi verið notaður við morðið.