Lögreglan á Suðurnesjum ætlar ekki að hefja nýja rannsókn á hvarfi Geirfinns Einarssonar.  Þetta kemur fram í Morgunblaðinu í dag. Útgefandi bókarinnar Leitin að Geirfinni skilaði gögnum til embættisins í vor sem styðja eiga kenningu þeirra sem standa að útgáfunni um afdrif Geirfinns. Er þar um að ræða svokallaðan 13. kafla bókarinnar, sem er óbirtur í bókinni en ætlaður yfirvöldum.

Í bókinni sjálfri er greint frá því að sjónarvottur, sem var barn að aldri, hafi orðið vitni að heiftarlegum átökum Geirfinns og ónefnds manns fyrir utan heimili Geirfinns að kvöldi 19. nóvember árið 1974. Átökin hafi færst inni í bílskúr og þar hafi sjónarvotturinn séð manninn slá Geirfinn niður með þungu áhaldi.

Bæði sjónarvotturinn og meintur banamaður Geirfinns eru enn á lífi.

Í 13. kaflanum er meintur banamaður Geirfinns nafngreindur en ekki sjónarvotturinn. Jafnframt er bæði í bókinni og 13. kaflanum upphafleg rannsókn lögreglunnar í Keflavík á málinu gagnrýnd harðlega og í 13. kaflanum er því haldið fram að lögregla hafi vísvitandi hylmt yfir með morði Geirfinns.

Sjá einnig: Meintur banamaður Geirfinns nafngreindur í 13. kaflanum sem hefur lekið á netið

Morgunblaðið sendi skriflega fyrirspurn til rannsóknardeildar lögreglunnar á Suðurnesjum um málið og í svari Nönnu Lindar Stefánsdóttur, aðstoðaryfirlögregluþjóns hjá embættinu, segir:

„Öll gögn sem borist hafa embætt­inu ný­verið um mál Geirfinns Ein­ars­son­ar hafa verið tek­in til skoðunar en eru ekki nægj­an­leg svo unnt sé að taka rann­sókn máls­ins upp að nýju. Því mun embættið ekki aðhaf­ast frek­ar vegna þessa nema ný sak­ar­gögn komi fram.“

Leita til ríkissaksóknara

Aðstandendur útgáfu bókarinnar Leitin að Geirfinni ætlar að leita til ríkissaksóknara um að hann skipi fyrir um rannsókn á morðinu á Geirfinni. Höfundur bókarinnar, Sigurður Björgvin Sigurðsson, segir við Morgunblaðið:

„Við sem stóðum að út­gáfu bók­ar­inn­ar mun­um á næstu dög­um fara þess á leit við rík­is­sak­sókn­ara, Sig­ríði J. Friðjóns­dótt­ur, að hún skipi fyr­ir um rann­sókn á morðinu á Geirfinni. Við höf­um all­an tím­ann bent á að óheppi­legt væri að málið færi inn á borð Kefla­vík­ur­lög­regl­unn­ar vegna tengsla við frum­rann­sókn­ina. Flest­ir Kefl­vík­ing­ar, ekki bara lög­reglu­menn, eru tengd­ir ein­hverj­um af rann­sak­end­um máls­ins árið 1974 eða öðrum málsaðilum. Það er því heppi­leg­ast að rann­sókn fari fram hjá öðru embætti. Rík­is­sak­sókn­ari get­ur tekið ákvörðun um það og fyr­ir slíku eru mörg for­dæmi.“