Amy og fjölskylda hennar voru um borð í norska skemmtiferðaskipinu Rhapsody of the Seas þann 24. mars árið 1998. Skipið var þá rétt lagst að bryggju í Curacao í Karabískahafinu. Sólbrúnir farþegar streymdu frá borði til að fara að snorkla, kafa og upplifa eyjuna. En fjölskylda Amy hljóp um skipið í leit að henni. Hún var þá 23 ára, Brad var 21 árs og foreldrar hennar, Rob og Iva voru 51 árs og 49 ára.
Sjá einnig: Hún hvarf sporlaust í skemmtisiglingunni – Síðan kom tölvupósturinn sem fékk mjög á foreldrana
Kvöldið áður en Amy hvarf hafði hún og Brad verið að skemmta sér saman. Klukkan 04.30 settust systkinin út á svalir káetunnar til að spjalla saman á meðan skipið nálgaðist Curacao. Eftir góða stund fór Brad inn til að leggja sig en Amy varð eftir í sólstólnum.
Á milli klukkan 05.15 og 05.30, þegar skipið var í aðsiglingu að eyjunni, sá Ron að Amy svaf í sólstólnum. Þegar hann fór á fætur hálfri klukkustund síðar voru dyrnar út á svalir opnar og Amy var horfin og fjölskyldan hefur ekki séð hana síðan.
Heimildarmyndin á Netflix hefur verið að vekja mikla athygli og margar nýjar kenningar komið fram.
Brad, bróðir Amy, telur sig vita hvað gerðist fyrir systur sína. Hann ræddi um málið í breska morgunþættinum This Morning fyrr í vikunni.
Fjölskyldan hefur alltaf verið viss um að Amy hvorki féll né hoppaði fram af svölunum.
„Við augljóslega vitum ekki hvar hún er en síðan að myndin kom út höfum við fengið þúsundir ábendinga frá fólki,“ sagði hann í This Morning.
„Við höldum að það sem gerðist var að Amy var sérstaklega valin sem skotmark. Einhver var að fylgjast með henni og tók hana og við teljum að hún hafi verið seld í einhvers konar kynlífsmansal.“
Hann sagði að þau séu að bíða eftir að einhver sem veit eitthvað um málið stigi fram og hjálpi þeim.
„Ég held reyndar að það séu fleiri sem vita hvað gerðist, en við erum að bíða eftir þessu eina símtali sem leysir málið.“
Nokkrir aðilar hafa haft samband við FBI og sagst hafa séð Amy, einn sá hana á vændishúsi í Curacao og annar sá hana á almenningssalerni þar sem Amy var hótað af fólki sem var með henni í för.
Árið 2005 fékk Bradley-fjölskyldan tölvupóst frá nafnlausum sendanda með skjáskoti af kynlífsauglýsingu og sagði FBI næstum öruggt að það væri Amy sem var á myndunum. En ekki tókst að komast að hver hafi sent póstinn eða hvar myndirnar voru teknar.
Fjölskyldan heldur enn í vonina um að Amy sé á lífi og að þau muni finna hana.
