Kóresk leikkona hefur gengist við því að hafa orðið þunguð eftir fyrrverandi eiginmann sinn, án hans samþykkis. Hjónin áttu fyrir eitt barn saman og áttu frosinn fósturvísi sem leikkonan ákvað að láta setja upp hjá sér eftir skilnaðinn án þess að hafa borið það undir sinn fyrrverandi.
Leikkonan Lee Si-young hefur fengið yfir sig harða gagnrýni. Hún sagði í yfirlýsingu á samfélagsmiðlum að hún hefði verið yngri þegar frumburður hennar kom í heiminn og ekki náð að vera sú fullkomna móðir sem hana dreymdi um að vera. Si-young er 43 ára í dag.
„Því lofaði ég sjálfri mér að fengi ég annað tækfæri myndi ég ekki sjá eftir nokkru. Ég hafði undirbúið mig undir að eignast annað barn mitt með aðstoð tæknifrjóvgunar á meðan ég var gift.“
Hún fór í eggheimtu, fyrrverandi maður hennar gaf sæði og úr því urðu til fósturvísar. Áður en Si-young náði að fara í uppsetningu voru hún og eiginmaður hennar farin að ræða skilnað. Þegar skilnaðurinn var loks frágenginn fékk hún skilaboð frá frjósemisstofunni sinni um að geymslutími fósturvísanna væri að renna út. Hún þurfti því að taka ákvörðun og ákvað að fara í uppsetningu.
„Þó að ég hafi ekki beðið um samþykki frá hinum aðilanum mun ég taka fulla ábyrgð á ákvörðun minni.“
Si-young sagðist sætta sig við gagnrýnina en hún ætlar nú að einbeita sér að frumburði sínum og vaxandi lífinu innra með henni.
Fyrrverandi maður hennar, Cho Seong-hyun, hefur gefið út að þó að hann sé ekki sáttur með framferði sinnar fyrrverandi muni hann taka þátt í lífi ófædds barns síns.
Netverjar áttu varla orð. Þarna hafi greyið Seong-hyun verið settur í ómögulega stöðu. Hann hafi ekki samþykkt þetta og eins sé það ekki raunhæfur valkostur að taka ekki þátt í lífi barnsins sem verður alsystkin frumburðar hans.
