Lionel Messi mun loksins geta hætt að hugsa um þann pening sem Barcelona hefur skuldað honum undanfarin fjögur ár – frá þessu greinir Sport á Spáni.

Messi yfirgaf Barcelona á frjálsri sölu 2021 og samdi við Paris Saint-Germain en hann átti þá inni 48 milljónir evra frá spænska félaginu.

Barcelona hefur hægt og rólega borgað þessa upphæð til goðsagnarinnar en lokagreiðslan er nú á leiðinni sem er um sex milljónir evra.

Barcelona átti eftir að gera upp samning Messi sem var neyddur í að fara annað á frjálsri sölu vegna fjárhagsvandræða en liðið er á betri stað í dag.

Messi er alls ekki eini fyrrum leikmaður Barcelona sem á inni laun en aðrar stjörnur eins og Sergio Busquets, Samuel Umtiti og Ousmane Dembele lentu í því sama.

Fjárhagsmál Barcelona voru í molum 2021 og þá sérstaklega eftir COVID faraldurinn en félagið er nú að gera upp allar sínar skuldir og stefnir á að greiða þær fyrir árslok.