Allt er á suðupunkti á milli Ísraels og Írans eftir að Ísraelar réðust á kjarnorkuinnviði landsins í síðustu viku. Hafa löndin gert árásir á hvort annað síðustu daga og óttast margir stigmögnun á milli ríkjanna.
Mohsen Rezao, herforingi í íranska byltingarvarðliðinu og fulltrúi í þjóðaröryggisráði Írans, segir að Pakistanar hafi fullvissað Írani um að ef Ísrael beitir kjarnorkusprengju muni Pakistan svara með samskonar árás á Ísrael. Pakistan og Ísrael eru tvö þeirra níu ríkja í heiminum sem búa yfir kjarnorkuvopnum.
Rezao segir að Pakistan hafi lofað því að standa með Íran í þeim átökum sem nú standa yfir og kallaði eftir því að íslömsk ríki standi sameinuð gegn Ísrael.
