Söngkonan Sabrina Carpenter tilkynnti að ný plata væri væntanleg, Man‘s Best Friend, og birti mynd af plötuumslaginu á samfélagsmiðlum í gær.

Það er óhætt að segja að aðdáendur skiptust í fylkingar, sumum þótti myndin frábær á meðan aðrir voru hneykslaðir og gagnrýndu söngkonuna harðlega fyrir að niðurlægja sig á þennan hátt og ýta undir hlutgervingu kvenna.

„Þú ert að niðurlægja þig,“ sagði einn aðdáandi.

„Þessi mynd er svo vandræðaleg,“ sagði annar.

„Ég vil ekki sjá einhvern karlmann draga þig um á hárinu, plís stattu upp,“ sagði einn.

Nokkrir sögðu að það væri ekki of seint að skipta um mynd á plötuumslaginu og hvöttu Sabrinu til að hlusta á aðdáendur og breyta.

„Hey, getum við fengið nýja mynd sem sökkar ekki? Þetta er alveg öfugt við þá sterku persónu sem þú hefur byggt upp…“

Sabrina gaf út fyrsta lagið af plötunni í síðustu viku, Manchild, og tónlistarmyndband við.