Gular og appelsínugular veðurviðvaranir eru í gildi á landinu fram eftir degi og sums staðar fram á kvöld. Veðurspár virðast ætla að ganga eftir en appelsínugular viðvaranir eru í gildi á norðan- og austanverðu landinu sem og undir Vatnajökli á suðaustanverðu landinu.

Á höfuðborgarsvæðinu er gul viðvörun í gildi frá klukkan 8 til 17. Gert er ráð fyrir norðan 13-20 m/s með snörpum vindhviðum. Fólk er hvatt að tryggja lausamuni sem geta fokið. Á Norðurlandi eystra, Austurlandi, Austfjörðum og Suðausturlandi eru appelsínugular viðvaranir í gildi. Þar verður hvasst og snjókoma eða slydda með lélegu skyggni og versnandi akstursskilyrðum.

Í hugleiðingum veðurfræðings á vef Veðurstofu Íslands segir að djúp lægð við Færeyjar valdi norðan óveðri hjá okkur í dag.

„Yfirleitt allhvass eða hvass vindur en stormur í vindstrengjum sunnanlands. Nú í morgunsárið er víða snjókoma eða slydda á Norður- og Austurlandi, en í dag hlýnar á þeim slóðum með talsverðri rigningu á láglendi. Sunnan heiða verður úrkoman mun slitróttari. Hiti 3 til 9 stig síðdegis og þá fer heldur að draga úr vindi. Gular og appelsínugular viðvaranir eru í gildi á öllu landinu og er fólk hvatt til að kynna sér aðstæður áður en haldið er í ferðalög.“

Að sögn veðurfræðings verður lægðin á svipuðum slóðum á morgun en grynnist smám saman.

„Áttin verður því áfram norðlæg, víða 10-18 m/s en heldur hægari seinnipartinn. Rigning um landið norðanvert og slydda eða snjókoma til fjalla, en þurrt að mestu sunnanlands. Hiti frá 2 stigum í innsveitum fyrir norðan upp í 12 stig syðst. Á fimmtudag og föstudag gera spár svo ráð fyrir áframhaldandi kaldri norðanátt, en vindur og úrkomuákefð ættu þó að fara minnkandi.“

Veðurhorfur á landinu næstu daga

Á miðvikudag:
Norðan 10-18 m/s, en 8-15 seinnipartinn. Rigning um landið norðanvert og hiti 2 til 7 stig, sums staðar talsverð úrkoma fram eftir degi. Þurrt að kalla sunnan heiða með hita 7 til 13 stig.

Á fimmtudag og föstudag:
Norðan og norðvestan 8-15 og rigning eða slydda með köflum, en þurrt að mestu sunnanlands. Hiti breytist lítið.

Á laugardag:
Norðlæg eða breytileg átt 3-10, skýjað með köflum og dálitlar skúrir eða slydduél á víð og dreif. Hiti 2 til 11 stig, mildast syðst.

Á sunnudag (hvítasunnudagur):
Suðvestlæg eða breytileg átt og víða dálitlar skúrir. Hlýnar lítillega.

Á mánudag (annar í hvítasunnu):
Austlæg átt og væta með köflum, en lengst af þurrt á Norðurlandi. Hiti 5 til 12 stig.