Töluvert hefur sést af rottum á ferli í Grafarvoginum undanfarið. Eru þetta rottur sem eiga uppruna sinn í Gufunesi en eru að flýja vegna framkvæmda.

Umræða um þetta hefur skapast á samfélagsmiðlahópi Grafarvogs. Það er að rottur hafi sést á kreiki, jafn vel að klifra upp veggi fjölbýlishúsa.

„Ég frétti hjá kunningja konu minni sem býr rétt hjá sjoppunni við Gufunesafleggjarann að það væri búið að veiða 4 rottur i þeirri gotu á fáum dögum. Meindýraeyðirinn sagði henni að vegna allra byggingaframkvæmdanna í Gufunesi þá væru þær farnar að leita sér að nýjum heimkynnum,“ segir upphafskona umræðunnar og varar fólk við þessu.

Það hafi meðal annars sést til einnar rottu klifra upp vegg þriggja hæða blokkar nálægt Rimaskóla. Ættu þeir sem búa hvað næst Gufunesinu að vera meðvitaðir um þetta, hafa augun opin og hurðir á heimilum sínum lokaðar.

„Þetta var heldur óskemmtileg reynsla að fá svona stórt kvikindi inn í hús til sín,“ segir hún.

Fleiri nefna að það hafi sést bæði rottur og mýs á ferli í hverfinu.

„Foreldrar mínir búa í Viðarrimanum og sáu rottu þar í síðustu viku. Þau létu Meindýraeyði Reykjavíkur vita,“ segir ein kona.