Sigurður G. Guðjónsson lögmaður staldrar við áhyggjur íþróttahreyfingarinnar af erlendum veðmálasíðum. Í aðsendri grein á Vísir.is bendir hann á að ÍSÍ, UMFÍ, ÍBR og KSÍ hafi á dögunum haldið málþing um þetta efni en þar hafi skort umfjöllun um veðmálastarfsemi íþróttahreyfingarinnar sjálfrar.

„Þetta eru Íslenskar getraunir og Íslensk getspá, sem eyða hærri upphæðum í ágengari auglýsingar en nokkur önnur fyrirtæki landsins. Hamast er á þjóðinni alla daga með gylliboðum um mögulegt ríkidæmi með þátttöku í Lottó, Viking lotto og Euro Jackpot. Er þó um 140 sinnum líklegra að verða fyrir eldingu en að vinna stóra vinninginn í síðastnefnda leiknum,“ segir Sigurður og segir íþróttahreyfinguna ausa fé í þessa starfsemi, í formi auglýsingakostnaðar og launa og hlunnina stjórnenda og stjórnarfólks.

Sigurður segir ennfremur:

„Auðvelt er að færa rök fyrir því að hægt væri að skila mun hærri fjárhæðum til íþróttastarfs í landinu með því að leggja þessa starfsemi niður, afnema ríkisvarða einokun á fjárhættuspilum og opna markaðinn með skynsamlegri reglusetningu um gagnsæi í rekstri og skattheimtu sem rynni í sérstakan sjóð.

Með slíku kerfi skuldbinda fyrirtæki sig til að fara eftir ákveðnum reglur sem tryggja meðal annars neytendavernd og að beina ekki auglýsingum sínum ekki að börnum og ungmennum, einsog Íslensk Getspá og Íslenskar getraunir gera með linnulausum auglýsingum í útvarpi, sjónvarpi og netmiðlum alla daga.“

Sigurður rekur síðan skaðsemi spilakassa sem Rauði krossinn, Landsbjörg og Happdrætti háskólans reka og segir að koma þurfi reglu á þennan rekstur en brýnt sé að láta stærri hluta ágóðans renna í málefnin og minna til stjórnenda veðmálafyrirtækjanna:

„Brýnast er fyrir samfélagið að koma skikki á þennan hluta fjárhættuspila á Íslandi. Samhliða væri skynsamlegt að endurskoða frá grunni fyrirkomulag veðmála og happdrættisleikja með það fyrir augum að tryggja að hærra hlutfall renni til íþrótta- og menningarstarfs fremur en að viðhalda hagsmunum núverandi einokunarfyrirtækja og stjórnenda þeirra.“

Greinina má lesa hér.