Mikael Nikulásson fyrrum þjálfari KFA og mikill stuðningsmaður KR er ósáttur með að Óskar Hrafn Þorvaldsson þjálfari KR ætli ekki að verjast þegar þörf er á í leikjum.

Óskar hefur talað mikið í upphafi móts um það að KR muni bara spila sóknarfótbolta og aldrei bakka frá því.

KR tapaði 4-3 gegn Aftureldingu í gær en mikið fjör er í leikjum liðsins.

„Þegar þú spilar frábæran fótbolta eins og KR gerði á köflum í gær, Aron Sig í fyrri hálfleik, ég man ekki eftir að hafa séð svona frammistöðu hjá manni í leik hér heima,“ sagði Mikael í Þungavigtinni í dag.

„Þegar þú spilar svona frábæran fótbolta eins og KR gerði á köflum og komnir í 2-0, þú veist að í fótbolta. Óskar veit meira en flestir um fótbolta, ég hef talað við hann um fótbolta frá 1982. Þú veist að í öllum leikjum þarftu að þjást.“

„Fullt af liðum spila frábæran fótbolta og það gengur vel, þá færðu ekki mörg færi á þig. Hvað er að því að spila frábæran fótbolta en að verjast aðeins líka? Ég vil spyrja Óskar, Hann hringir eflaust í mig á eftir.“

Mikael greip svo í frasa sem Óskar notaði um daginn að detta af hjólinu.

„AF hverju bara leið eitt? Ef barnið þitt dettur af hjólinu, þá verður það að standa upp og hjóla aftur. Ég nenni ekki að vera með barnið mitt úti í 10 ár að detta af hjólinu, það er ekki hægt að detta alltaf aftur af hjólinu. KR er búið að gefa Breiðablik og Aftureldingu fjögur stig og tapa sjálfir fimm stigum, báðir leikir sem þeir eiga að vinna.“

„KR voru stórkostlegir, í stöðunni 3-2 þá vissi ég að KR myndi tapa leiknum. Ég sá í hvað stefndi, sá hvernig varnarleikurinn var.“