Bæjarstjórn í Orihuela liggur undir ámæli vegna þess að almennri hirðu er ekki sinnt. Rusl flæðir um götur, gróður er ekki klipptur og gatnaviðgerðum ekki sinnt. Mótmælt verður við ráðhúsið á mánudag.
Eins og sjá má á myndum er sorphirðu augljóslega ábótavant í Orihuela þessa dagana. Engu að síður hækka sorphirðugjöldin hjá íbúum ár frá ári og hafa aldrei verið hærri en núna. Það er 203 evrur á ári. Hafa sumir íbúar á svæðinu gripið til mótmæla á götum úti vegna sinnuleysi bæjarstjórnarinnar í Orihuela.
Bent er á að tunnur séu allt of fáar og að þær séu allt of sjaldan tæmdar. Fólk verður að losa sig við ruslið og því flæðir það um götur. Þetta veldur því meðal annars að fólk með fötlun, svo sem fólk í hjólastólum, getur átt erfitt með að komast um.
Boðað hefur verið til mótmæla við ráðhús Orihuela Costa í Calle Picasso á Playa Flamenca á mánudag, 5. maí klukkan 16:30.
Á svæðinu er ein stærsta Íslendingabyggðin utan Íslands. Þúsundir Íslendinga annað hvort búa eða eiga fasteign á svæðinu. Hafa Íslendingar ekki farið varhluta af krísunni sem upp er komin.
„Öll þjónusta við okkur frá Orihuela, aumingjaskapur bæjarráðs Orihuela Costa og stjórnmálaafla í Orihuela borg, er til háborinnar skammar og okkur ekki bjóðandi,“ segir málshefjandi umræðunnar í Íslendingagrúbbu á samfélagsmiðlum. „Munum..að heiður bæjar okkar, Orihuela Costa, og forðun á verðfalli eigna okkar hér skiptir okkur öll máli.“
Annar bendir á að þetta hafi skipt hann máli þegar hann hafi verið að taka ákvörðun um búsetu.
„Ég var þarna á ferð um daginn að skoða hvar ég hefði áhuga á að búa og þetta svæði var tekið strax út af listanum út af þessum sóðaskap og það eru fleiri bæir sem eru ekki með þessi mál í góðu þannig að ég er ekki enn þá kominn með niðurstöðu um búsetu þarna úti,“ segir hann.
