Um var að ræða þrjá unga drengi á aldrinum 8-10 ára sem höfðu dvalið í húsinu frá árinu 2021. „Við höfum nú gefið þremur börnum líf sitt aftur,“ segir lögreglustjórinn, Francisco Javier Lozano, í samtali við þýska blaðið Bild.
Foreldrar drengjanna voru handteknir en um er að ræða 48 ára konu með þýskan og bandarískan ríkisborgararétt og 53 ára karlmann sem er fæddur í Þýskalandi.
Fjölskyldan mun hafa lokað sig algjörlega af þegar Covid-faraldurinn reið yfir heimsbyggðina. Höfðu nágrannar fólksins haft samband við lögreglu þar sem þeir lýstu því að hafa ekki séð drengina um margra ára skeið og þá virtust þeir ekki ganga í skóla.
Í fréttum þýskra fjölmiðla kemur fram að aðstæður í húsinu hafi verið „ógeðslegar“ þar sem rusl var út um allt og skítur úr gæludýrum á gólfinu svo eitthvað sé nefnt. Tveir drengjanna eru tvíburar, átta ára, og voru þeir með bleyjur á sér þegar lögregla bjargaði þeim. Þá sváfu þeir í rimlarúmum.
Þegar lögregla ætlaði að leiða drengina út úr húsinu kom í ljós að þeir áttu enga skó í sínum stærðum.
Lögregla er sögð hafa hafið rannsókn málsins þann 14. apríl síðastliðinn eftir að nágranni gerði lögreglu viðvart um að eitthvað undarlegt væri á seyði í húsinu.
Lögregla mun hafa fylgst með húsinu í nokkuð marga daga og fylgst með mannaferðum og innkaupum fjölskylduföðurins.
Rannsókn málsins stendur yfir og segir einn sem kemur að rannsókninni í samtali við El Comercio að foreldrarnir hafi mögulega verið logandi hræddir við veiruna eða önnur veikindi. Í húsinu fannst til dæmis mjög mikið magn af andlitsgrímum og allskonar lyfjum.
Foreldrar drengjanna eru í haldi lögreglu á meðan málið er í rannsókn.
