Þetta segir Sigríður Björk í viðtali við RÚV.
Í þættinum var greint frá því að ríkasti maður Íslands, Björgólfur Thor Björgólfsson, hefði varið tugum milljóna króna í að láta njósna um hóp fólks árið 2012 sem hafði stefnt honum vegna falls Landsbankans. Á meðal þeirra sem unnu við þessar njósnir voru lögreglumenn, ýmist nýhættir eða enn við störf.
Í kjölfar gjaldþrots Landsbankans efndi hópur fjárfesta í bankanum til hópmálsóknar gegn aðaleigandanum, Björgólfi Thor, og krafðist skaðabóta. Málinu lauk með sátt. Afhjúpun Kveiks leiðir hins vegar í ljós að fyrirtækið, PPP sf., sem stofnað var af af þeim Jóni Óttari Ólafssyni, afbrotafræðingi og lögreglumanni, og Guðmundi Hauki Gunnarssyni, lögfræðingi, fylgdist ítarlega með ferðum manna sem tóku þátt í hópmálsókninni, þar á meðal Vilhjálmi. Fengu þeir Jón Óttar og Guðmundur Haukur til liðs við sig lögreglumann, Lúðvík Kristinsson, varðstjóra í umferðardeild lögreglunnar, en hann varði á sjöunda tug vinnustunda í að njósna um menn fyrir PPP, samhliða vöktum sínum hjá lögreglunni. Hefur Lúðvík verið leystur frá starfsskyldum og mál hans er til rannsóknar hjá ríkissaksóknara.
Sigríður Björk segir í samtali við RÚV að ríkislögreglustjóraembættinu sé mjög brugðið að heyra það sem fram kom í þættinum. Hún segist hafa áhyggjur af því að málið rýri traust til lögreglu.
„Að sjálfsögðu höfum við áhyggjur af því. Traustið er afskaplega mikilvægt og öll svona mál mál sem koma upp geta haft alvarleg áhrif á það,“ segir hún og bætir við að þess vegna sé mjög mikilvægt að rannsaka það sem gerðist. Í viðtalinu segir hún einnig að það komi henni á óvart að þetta hafi gerst á Íslandi.
