Cristiano Ronaldo vandar Gary Lineker og Alan Shearer ekki kveðjurnar eftir að þeir félagar gerðu lítið úr honum í sumar á Evrópumótinu í Þýskalandi.
Lineker og Shearer voru ekki hrifnir af því að sjá Ronaldo gráta í 16 liða úrslitum þegar hann klikkaði á vítaspyrnu gegn Slóveníu.
Þeir töluðu um Ronaldo sem fúlan skólakrakka en Ronaldo og félagar komust áfram í vítaspyrnukeppni.
„Þeir vita ekki neitt,“ segir Ronaldo í viðtali við Rio Ferdinand. „Það eru miklu auðveldara að gagnrýna en að kunna að meta hvað er í gangi. Við vitum hvernig fjölmiðlar virka, ef þú talar á jákvæðan hátt þá selur það ekki. Þeir verða að vera neikvæðir. Ef þú talar illa um Ronaldo þá endar það á forsíðum því ég er vinsælasti maður í heimi,“ segir Ronaldo.
„Hvað á ég að gera? Græt ég og hætti svo í fótbolta því tvær rottur voru að gagnrýna mig? Heimurinn elskar mig, stuðningsmenn elska mig. Það er það sem heldur mér gangandi. Það mun enginn taka neitt frá mér af því að tveir menn í sjónvarpi sem engin þekkir gagnrýna mig.“
Ronaldo útskýrði svo fyrir Ferdinand af hverju hann fór að gráta. „Þegar þú ert með ástríðu þá getur þú ekki stjórnað öllu. Ég grét því ég klikkaði á víti, ég grét ekki því Portúgal gæti mögulega dottið út. Ég grét því fólkið mitt var komið, börnin mín, mamma og konan mín. Ég varð sorgmæddur yfir því.“
„Ég hugsaði aldrei um að Portúgal myndi tapa.“
