Jóhann Ingi Hafþórsson blaðamaður á Morgunblaðinu leggur til breytingar í fótboltanum, hann telur refsingar í dag of þungar.

Jóhann skrifar pistil í blað dagsins um vítaspyrnur í fótbolta. „Það eru um 80 prósent líkur á marki þegar vítaspyrna er dæmd í fótbolta samkvæmt þeim gögnum sem bakvörður dagsins skoðaði áður en hann ritaði þennan pistil. Er þá ekki allt of hörð refsing að dæma hendi og víti í sumum tilvikum?,“ skrifar Jóhann í Morgunblaðið.

Hann telur að refsingin sé of hörð miðað við mögulega niðurstöðu í leiknum ef varnarmaður fær ekki boltann í höndina. „T.d. þegar varnarmaður fær boltann algjörlega óvart í höndina og það er engin hætta á ferðum. Ættu þá að vera 80 prósent líkur á að sóknarliðið skori þar sem varnarmaðurinn gerði það eitt rangt að vera með útlimi?,“ skrifar Jóhann.

„Það er eitt þegar varnarmenn handleika boltann viljandi og verja jafnvel á marklínunni, eins og Luis Suárez, fyrrverandi leikmaður Liverpool og Barcelona, gerði einu sinni fyrir landslið sitt á HM. Þá var dæmt víti og rautt enda kom hann í veg fyrir mark. En þegar leikmenn eru utarlega í teignum og fá boltann óvart í höndina mætti refsingin vera önnur.“

Jóhann leggur frekar til að dæmd verði óbein aukaspyrna. „Þá er enginn taktur í því að það sé sama refsing fyrir ljóta tæklingu inni í teig og fyrir það að vera með útlimi sem skaða engan.“