Það var svo sannarlega ekkert grín að mæta harðhausnum Duncan Ferguson sem er þekktastur fyrir tíma sinn hjá Everton.

Ferguson er skoskur og var gríðarlega harður í horn að taka og mætti eitt sinn Jimmy Bullard er sá síðarnefndi lék með Wigan.

Bullard gerði mistök í leik árið 2006 gegn einmitt Everton er hann óskaði eftir því að fá að hitta Ferguson í leikmannagöngunum eftir lokaflautið.

Bullard var ósáttur með hegðun Ferguson á velli en hann hafði meitt Paul Scharner, liðsfélaga Bullard, inni í vítateig eftir hornspyrnu.

Það varð til þess að Bullard missti hausinn og í raun hótaði harðhausnum sem mætti síðar ber að ofan tilbúinn í slagsmál við búningsklefana.

,,David Moyes ákvað að skipta Ferguson inná þegar tíu mínútur voru eftir og þeir fengu horn. Við komum boltanum burt en það eina sem ég heyri er að miðvörðurinn okkar liggur eftir í grasinu,“ sagði Bullard.

,,Ferguson hleypur burt brosandi og ég áttaði mig um leið á að hann hefði gert eitthvað af sér. Ég horfi í kringum mig og sé Lee McCullough sem var Skoti í okkar liði og James McFadden sem er skoskur og spyr þá hvort allt sé í lagi.“

,,Ég ákvað að vaða í Duncan en passaði mig á sama tíma, hann hafði verið á vellinum í kannski fimm mínútur og tókst að fá rautt spjald.“

,,Hann gekk af velli og ég ákvað að hóta því að ég myndi sjá hann í leikmannagöngunum, að ég væri að bíða eftir honum.“

,,McCullough var ekki lengi að benda mér að ég hefði gert stór mistök – Duncan svaraði um leið og kallaði mig dverg og var svo mættur í göngin ber að ofa tilbúinn í slagsmál.“

,,Hann tók mig hálstaki og hélt mér á lofti en það var enginn á staðnum til að styðja við mig, þeir voru allir farnir inn í klefa!“