Manchester United og Napoli gætu gert skipti í sumar þar sem Rasmus Hojlund færi til Ítalíu og Victor Osimhen í hina áttina, eftir því sem fram kemur í ítölskum miðlum.

Hojlund hefur engan vegin fundið sig á Old Trafford, en hann var keyptur frá ítalska liðinu Atalanta á yfir 70 milljónir punda fyrir tveimur árum.

Napoli sér fyrir sér að framherjinn ungi geti blómstrað á ný á Ítalíu og er til í að taka hann.

Osimhen er hins vegar engan veginn í plönum Napoli eftir tilraunir hans til að koma sér burt síðasta sumar. Að lokum fór hann á láni til Galatasaray, þar sem hann hefur raðað inn mörkum.

Nígerski framherjinn hefur verið orðaður við United áður og gæti hann endað þar í sumar, en ekki er tekið fram hvort eða hversu miklir fjármunir færu á milli félaganna einnig.