Jose Mourinho er ansi umdeildur en hann hefur þjálfað nokkur af stærstu félögum Evrópu en er í dag á mála hjá Fenerbahce í Tyrklandi.

Mourinho hefur tjáð sig um Ruben Amorim, stjóra United, sem hann þekkir ágætlega en hann tók við félaginu í nóvember.

Gengi United var í raun skelfilegt undir Amorim í deildinni heima fyrir en liðið komst þó alla leið í úrslitaleik Evrópudeildarinnar.

Þar töpuðu Amorim og hans menn gegn Tottenham 1-0 en Mourinho hefur þjálfað bæði þessi félög og þekkri vel til bæði í Manchester og í London.

Útlit er fyrir að Amorim fái að halda starfinu og byrja næsta tímabil með United en ef gengi liðsins batnar ekki þá er ljóst að hann mun að lokum fá sparkið.

Mourinho tengir við reynslu Amorim sem fékk engan tíma til að aðlagast á miðju tímabili en hann lenti í því sama hjá Porto á sínum tíma.

,,Ég hef lesið einhver ummæli Amorim og hann segist vera ánægður með að vera mættur þangað – hann hefur verið þarna í sex mánuði,“ sagði Mourinho.

,,Þegar ég fór til Porto þá gerðist það sama, ég kom í janúar og gengið var erfitt til að byrja með og við áttum í erfiðleikum með að komast í Meistaradeildina.“

,,Ég var á báðum áttum í þessum úrslitaleik því ég elska United og samband mitt við Ruben er frábært. Að sama skapi þá sá ég Heung Min Son gráta með bikarinn eftir leik. Þetta var sérstakt augnablik fyrir stuðningsmenn Tottenham.“