Fjórum leikjum var að ljúka í Bestu deild karla en heil umferð fer fram í dag og er aðeins einn leikur eftir.
Lokaleikur dagsins er viðureign Stjörnunnar og KR en flautað er til leiks eftir um klukkutíma eða 19:15.
Nokkrir athyglisverðir leikir voru spilaðir klukkan 16:15 í dag en níunda umferð deildarinnar klárast þennan fimmtudag.
ÍBV vann til að mynda frábæran heimasigur á FH en lokatöur í Eyjum voru 2-1 eftir dramatískt sigurmark Sverris Páls Hjaltested á 92. mínútu.
Óvæntustu úrslitin voru klárlega í Kópavogi en Breiðablik tapaði 1-4 heima gegn ÍA sem hefur verið í brasi í byrjun tímabils.
ÍA komst í 3-0 í þessum leik áður en Tobias Thomsen lagaði stöðuna úr vítaspyrnu en gestirnir skoruðu svo fjórða markið seint í uppbótartíma venjulegs leiktíma.
Valur vann þá Aftureldingu 0-2 í Mosfellsbæ og Fram tapaði heima 1-2 gegn KA eftir annað dramatískt mark í uppbótartíma.
Færeyingurinn Jóan Símun Edmundsson sá um að tryggja KA sigur í þessum leik og um leið þriðja sigur liðsins í deild á tímabilinu.
