Breiðablik er úr leik í bikarnum eftir tap gegn Vestra á heimavelli í gær, Íslandsmeistararnir eru úr leik eftir tapið í 16 liða úrslitum.

Breiðablik er með 13 stig í Bestu deildinni og við toppinn en Kristján Óli Sigurðsson, furðar sig á breytingum á byrjunarliðinu í gær.

Brynjar Atli Bragason kom inn í markið og þá var Daniel Obbekjær mættur í hjarta varnarinnar.

„Það er frábær spurning, Brynjar átti ekki góðan leik í fyrra markinu. Hann varði á 96 mínútu en það skiptu engu. Ég vona að þetta hafi verið síðasti leikur Daniel Obbekjær, þetta eru lélegustu kaup Breiðabliks í útlendingum. Hafa nú mörg verið slæm, Ásgeir Orri er tvítugur hafsent. Af hverju spilar hann ekki?,“ segir Kristján í Þungavigtinni í dag.

Kristján vill þó meina að Blikar hafi átt að jafna leikinn. „Sanngjarn sigur en aðstoðardómarinn drullar upp á bak þegar Kristófer jafnar, það var ekki rangstaða. Trúðarnir á RÚV sýndu það ekki nógu vel að þetta var ekki rangstaða.“

Mikael Nikulásson segir slæmt ástand í Kópavoginum. „Virkilega sanngjarnt, vektu mig bara þegar Blikarnir ætla að byrja þetta sumarið. Þeir hafa ekki getað rassgat frá því að mótið byrjaði.“

„Viðtölin við Dóra eftir leik, þetta er eins og að horfa á málningu þorna. Það er ekki góð ára yfir Breiðablik. Blikarnir voru á 50-60 prósent hraða. Það er Tobias Thomsen að þakka að Breiðablik er ekki í fallbaráttu.“