Bjarni Helgason, íþróttafréttamaður á Morgunblaðinu, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþrótavikunni á 433.is.

FH er með núll stig í Bestu deild karla eftir fyrstu tvo leiki deildarinnar. Liðið hefur tapað gegn Stjörnunni og Vestra.

FH-ingar hafa vanist mikilli velgengni í gegnum tíðina en nú er öldin önnur og margir á því að liðið verði í neðri hlutanum.

„FH er lið í uppbyggingu en spila eins og þeir séu hræddir. Hverju hefur Heimir (Guðjónsson) að tapa á því að fara framar með liðið og gefa fólkinu í stúkunni eitthvað,“ sagði Hrafnkell í þættinum.

Sagan segir að harðir stuðningsmenn FH séu allt annað en sáttir með gang mála. „Gaflarar liggja ekki á skoðunum sínum,“ sagði Hrafnkell.

„Gætu orðið þjálfarabreytingar á þessari leiktíð?“ spurði Helgi en menn hafa litla trú á því. „Það þyrfti allt að vera í tómu rugli,“ svaraði Hrafnkell.

Bjarni benti á að FH sé ekki á þeim stað sem Heimir hefði viljað á þessum tímapunkti.

„Heimir kom til mín eftir fyrsta tímabilið með FH. Þá var planið að koma stöðugleika á liðið fyrstu tvö tímabilin, koma sínum áherslum að, og á þriðja tímabilinu átti að gera atlögu að titlinum. Það tímabil er núna og þessi uppbygging hefur ekki orðið að neinu,“ sagði hann.

„Í stað þess að vera alltaf að tala um Evrópubaráttu og efri hluta, er ekki bara í lagi að slaka á og byggja upp lið í rólegheitum,“ lagði Hrafnkell til enn fremur.