Pat Nevin, fyrrum leikmaður skoska landsliðsins, trúir ekki að Manchester United hafi hleypt landa sínum Scott McTominay ódýrt frá félaginu til Napoli síðasta sumar.
Miðjumaðurinn hefur heillað marga hjá Napoli frá því hann kom. Er hann þá með sex mörk og fjórar stoðsendingar í Serie A á leiktíðinni.
„Ég held að Scott McTominay hafi verið 50 milljóna punda virði þegar hann fór frá Manchester United. Þetta voru risastór mistök hjá félaginu,“ segir Nevin.
„Það skiptir engu máli hvaða Skota þú talaðir við, það trúði enginn eigin augum yfir að hann væri að fara á 25 milljónir punda.“
McTominay er nú með skoska landsliðinu í verkefni og skoraði hann einmitt sigurmarkið gegn Grikklandi í Þjóðadeildinni í gær.
