Arnar Gunnlaugsson, þjálfari íslenska karlalandsliðsins, útilokar ekki að kalla leikmenn út til Kósóvó, þó ekki fyrir leik liðanna á morgun.

Ísland mætir Kósóvó á morgun í fyrri leik liðanna í umspili um að halda sæti sínu í B-deild Þjóðadeildarinnar. Seinni leikurinn, eiginlegur heimaleikur Íslands, fer fram á sunnudag á Spáni.

Þegar er ljóst að Valgeir Lunddal Friðriksson nær leiknum ekki vegna meiðsla og þá missir Mikael Anderson af báðum leikjunum. Því var Arnar spurður að því á blaðamannafundi í Kósóvó í dag hvort það kæmi til greina að kalla inn leikmenn.

„Ekki fyrir leikinn á morgun en við útilokum ekki að kalla inn leikmenn eftir leikinn. Það eru nokkrir á hættu á að fá leikbann og það geta alltaf komið upp meiðsli. Við áskiljum okkur rétt til að kalla inn leikmenn ef á þarf að halda,“ sagði Arnar.