Ljóst er að mál Gylfa Þórs Sigurðssonar er á mjög viðkvæmum stað, hvorki Víkingar né Breiðablik vilja tjá sig um stöðu viðræðna við Val og Gylfa.

Samkvæmt því sem 433.is kemst næst eru bæði félög mjög nálægt því að nálgast samkomulag við Val um kaupverð Gylfa Þórs.

Stjórn Vals varð ljóst um helgina að Gylfi vildi fara og nánast ómögulegt yrði að snúa þeirri ákvörðun hans. Víkingur hafði þá í nokkra mánuði reynt að fá Gylfa.

Breiðablik er nú komið í leikinn og samkvæmt heimildum 433.is hefur Breiðablik hafið viðræður við Val. Samkomulag þeirra við Val nálgast líkt og hjá Víkingi.

Heimildarmaður 433.is segir að málið ætti að skýrast á allra næstu dögum, það sé vilji Vals og allra sem koma að borðinu að það dragist ekki á langinn.

Það verður því að öllum líkindum í höndum Gylfa að ákveða hvort hann vilji fara í Víking eða í Breiðablik. Gylfi lék með Breiðablik fyrir tuttugu árum þegar hann var seldur til Reading.

Fyrrum samherjar Gylfa úr landsliðinu sjá um málin hjá liðunum, Kári Árnason hjá Víkingi og Alfreð Finnbogason hjá Breiðablik. Það verður því í þeirra höndum að selja Gylfa hvort skrefið sé heillavænlegra fyrir þennan besta landsliðsmann sögunnar.