Fyrrum varnarmaður Barcelona, Dani Alves, er sagður vera að kaupa portúgalskt félag og hyggst jafnframt skrá sjálfan sig sem leikmann, en hann er 42 ára gamall.
Samkvæmt ESPN hefur Alves gengið frá helstu atriðum varðandi kaup á Sporting Clube de Sao Joao de Ver, sem leikur í þriðju deild Portúgals, og er stefnt á að hann skrifi undir sex mánaða leikmannasamning.
Alves hefur ekki spilað keppnisleik síðan í janúar 2023, þegar samningi hans við mexíkóska félagið Pumas var rift í kjölfar handtöku hans. Í mars 2025 var nauðgunardómur yfir honum hins vegar felldur úr gildi af spænskum dómstólum, þar sem talið var að sönnunargögn styddu ekki sakfellingu. Allar takmarkanir á ferðum hans voru þá afnumdar.
Eftir lausn úr fangelsi hefur Alves unnið bak við tjöldin í knattspyrnunni, meðal annars sem umboðsmaður, en alltaf með það markmið að snúa aftur á völlinn. Hann hefur verið í sérstöku æfingaprógrammi og telur sig aðeins þurfa um 30 daga til að ná leikformi.
Alves á glæstan feril að baki, vann meðal annars Meistaradeild Evrópu þrisvar sinnum með Barcelona og Ólympíugull með Brasilíu 2021. Nú stefnir hann á nýtt ævintýri í Portúgal.
