Víkingur hefur hlotið sekt og verið dæmdur ósigur í annað skiptið á Reykjavíkurmótinu þar sem liðið tefldi fram ólöglegum leikmanni.
Liðið hefur valið að láta Stíg Diljan Þórðarson, sem gekk aftur í raðir félagsins í vetur frá Triestina, spila á Reykjavíkurmótinu, en hann er ekki með leikheimild.
Hann var í liðinu sem gerði 2-2 jafnftefli við Fjölni í gær en Grafarvogsliðinu er dæmdur 3-0 sigur.
Víkingur undirbýr sig af kappi fyrir leikina gegn Panathinaikos í útsláttarkeppni Sambandsdeildarinnar 13. og 20. febrúar næstkomandi.
Í leik Víkings R. og Fjölnis, í Reykjavíkurmóti karla, sem fram fór þann 21. janúar tefldi lið Víkings R. fram ólöglegum leikmanni.
Stígur Diljan Þórðarson spilaði með Víking R. í leiknum en var skráður í lið erlendis. Af þessum sökum hefur Víkingur R. verið sektað um 60.000 krónur. Úrslitum leiksins er breytt í 3-0 Fjölnir í vil.
Úr ábendingum sem sendar voru til þátttakenda í Reykjavíkurmóti meistaraflokks:
Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út. Viðkomandi félög verða sektuð samkvæmt reglugerð KSÍ um Deildarbikarkeppni .
Samkvæmt reglum KSÍ um Deildarbikarkeppni segir í grein 10.1:
Lið, sem mætir ólöglega skipað til leiks, skal sæta sekt að upphæð kr. 30.000 og að auki kr. 30.000 fyrir hvern leikmann sem ekki hefur keppnisleyfi með viðkomandi félagi og tekur þátt í leiknum. Félag, sem notar leikmann, þjálfara eða forystumann í leikbanni, skal sæta sektum að upphæð kr. 100.000.
