Það hefur legið í loftinu í töluverðan tíma að Sölvi, sem var aðstoðarmaður Arnars í Víkinni, tæki við liðinu. Sjálfur er hann stoltur og undirbúinn fyrir komandi átök.
„Mér líður frábærlega með þetta og er virkilega stoltur af þessu. Ég er þakklátur fyrir traustið sem þeir hafa sýnt mér, að fá að halda áfram á þessari vegferð sem við Víkingar eru á.
Mig er búið að gruna þetta alveg síðan Arnar fór í viðræður við Norrköping í fyrra. Ég er búinn að vera í startholunum síðan þá. Maður vissi að fyrst hann fór ekki í fyrra að hann myndi fara eitthvað annað. Árangur hans með Víkingi hefur bara sýnt það að hann er frábær þjálfari og það voru algjör forréttindi að fá að vinna með honum. Hann er ekki bara frábær þjálfari heldur líka frábær vinur og einstaklingur,“ sagði Sölvi í samtali við 433.is í dag.
Sem fyrr segir var Sölvi aðstoðarmaður Arnars og þekkir því hvern krók og kima í Fossvoginum.
„Manni líður svo vel hérna. Allt í kringum meistaraflokkinn og félagið, þetta eru harðir stuðningsmenn og Víkingar inn að beini sem eru hérna. Við stefnum öll að sama markmiði og það er svo mikil samheldni innan klúbbsins, á skrifstofunni og hjá stuðningsmönnum. Þetta er svo vel tengt. Svo bý ég líka í hverfinu og það er eitthvað svo gott að vera Víkingur núna. Ég gæti ekki óskað mér neins meira.“
Sölvi er á leið í alvöru verkefni með Víkinga eftir tæpan mánuð. Mætir liðið gríska stórliðinu Panathinaikos í útsláttarkeppni Sambandsdeildarinnar eftir frábæran árangur í deildarkeppninni fyrir áramót.
„Það leggst mjög vel í mig. Þetta er búið að vera skrýtið undirbúningstímabil. Við getum ekki verið á æfingasvæðinu og tekið því rólega eins og er oft á undirbúningstímabili. Við verðum bara strax að setja í fimmta gír og keyra á þetta. Við þurfum að vera klárir ef við ætlum að eiga einhvern séns á móti þeim,“ sagði Sölvi um verkefnið.
Sölvi sagði svo enn fremur að markmið næsta tímabils væri að endurheimta báða titlana hér heima, en ítarlegra viðtal er í spilaranum.
