Arsenal er vonbrigði tímabilsins á Englandi en þetta er skoðun fyrrum leikmanns félagsins, William Gallas, sem er ansi umdeildur.

Gallas lék með fjórum liðum í London á sínum ferli en hann er í dag sparkspekingur og lætur oft umdeild ummæli falla.

Gallas vill meina að Arsenal hafi alls ekki staðist væntingar í vetur en þegar þrjár umferðir eru eftir á liðið ekki möguleika á að vinna úrvalsdeildina og situr í öðru sæti.

Frakkinn vildi meira frá sínu fyrrum félagi í vetur en liðið hefur enn ekki náð að vinna þann stóra undir Mikel Arteta sem tók við árið 2019.

,,Í ensku úrvalsdeildinni þá er Arsenal vonbrigði tímabilsins. Ef þú berð þetta tímabil saman við síðustu tvö tímabil, þeir hafa alls ekki verið góðir,“ sagði Gallas.

,,Afsakið mig en ég er mjög svekktur með þeirra frammistöðu, sama hvað gerist í Meistaradeildinni. Þeir áttu heimsklassa frammistöðu gegn Real Madrid en ég vildi meira frá þeim í deildinni.“