Medhi Benatia, yfirmaður knattspyrnumála Marseille, hefur tjáð sig eftir ‘lygasögur’ sem voru birtar í frönskum fjölmiðlum.

Þar var fjallað um þrjá eða fjóra leikmenn en þeir sem voru helst nefndir eru Mason Greenwood, Adrien Rabiot og Pierre-Emile Hojbjerg.

Talað var um það að þeir síðarnefndu væru að neita því að spila með Greenwood sem er fyrrum leikmaður Manchester United og var handtekinn á sínum tíma fyrir heimilisofbeldi.

Framherjinn Greenwood hefur átt gott tímabil en hefur aðeins skorað eitt mark í síðustu fimm leikjum sínum.

Franskir miðlar greindu frá því að bæði Hojbjerg og Rabiot væru ósáttir með stöðu Greenwood innan félagsins og hefðu engan áhuga á því að spila með Englendingnum.

Einn miðill bendir á að málið tengist á einhvern hátt heimilisofbeldinu umtalaða sem átti sér stað fyrir um þremur árum.

,,Getiði ímyndað ykkur? Ef þetta væri satt? Hann hefur ekkert komið til mín og enn frekar, haldiði að ég þurfi að einhver komi til mín ef þetta væri staðan?“ sagði Benatia.

,,Pierre-Emile Hojbjerg er einn mesti atvinnumaður sem við eigum og hann er leikmaður sem vill að allir standi saman líkt og Rabiot.“

,,Í dag vill Rabiot afreka einn hlut og það er að komast í Meistaradeildina. Þeir hafa aldrei mætt á skrifstofuna til að ræða þessi mál.“