Stjarnan skoraði draugamark í 2-1 sigri liðsins á FH í fyrradag þar sem dómari leiksins Vilhjálmur Alvar Þórarinsson var í sviðsljósinu. Markalaust var í hálfleik.

Mikael Nikulásson fyrrum þjálfari KFA kallar eftir því að marklínutækni verði komið fyrir í Bestu deildinni.

Það var svo á 64 mínútu sem Stjarnan skoraði draugamark, Örvar Eggertsson skallaði þá boltann að marki en Mathias Rosenörn komst fyrir boltann.

Vilhjálmur Alvar ætlaði ekki að dæma mark en Gylfi Már Sigurðsson, aðstoðardómari flaggaði markið. Í sjónvarpi var ómögulegt að segja hvort boltinn væri inni.

„Það er ekki fræðilegur séns, ég var mjög hissa á því hversu rólegur Heimir Guðjónsson var eftir leik. Ef Gulli Jóns hefði verið klókur og náð í Kjartan Henry í viðtal þá væri hann í leikbanni núna,“ sagði Kristján Óli Sigurðsson Í Þungavigtinni.

Mikael tók í sama streng. „Þeir fá gefins mark sem er aldrei gott, það er skrýtið að það sé ekki marklínutækni. Það á ekki að vera það flókið, FH-inga eiga að vera pirraðir yfir því.“