Grasrótarverðlaunum KSÍ er skipt upp í þrjá flokka: Grasrótarverkefni ársins, Grasrótarfélag ársins og Grasrótarpersóna ársins. Þetta er í þriðja sinn sem verðlaunum er þrískipt með þessum hætti.
Viðurkenningu fyrir Grasrótarverkefni ársins 2024 hljóta Stjarnan og Öspin fyrir fótboltaæfingar fyrir einstaklinga með fötlun.
Snemma árs 2023 var sett á laggirnar samstarfsverkefni Stjörnunnar og Asparinnar þar sem 40-50 einstaklingar á aldursbilinu 5-50 ára með fötlun koma saman til fótboltaæfinga tvisvar í viku, í íþróttahúsinu í Sjálandsskóla og í Miðgarði í Garðabæ. Í umsögn um verkefnið segir m.a.: Mikilvægt er að allir fái tækifæri til að stunda fótbolta, óháð fötlun, og æfingar hjá Stjörnunni/Öspinni eru opnar öllum. Markmiðið er að gefa öllum tækifæri til að æfa fótbolta. Allir eiga rétt á að velja sér íþrótt sem þau hafa áhuga á, fatlað fólk sem ófatlað fólk. Einstaklingar með fatlanir sem stunda íþróttir eru fyrst og fremst íþróttamenn; þeir hafa sömu grunnþarfir, drifkraft og drauma og allir aðrir íþróttamenn. Og eins og fyrir alla íþróttamenn er þjálfun afgerandi þáttur fyrir gæði íþróttaupplifunar þeirra. Og einstaklingar með fatlanir hafa sömu löngun og aðrir íþróttamenn til að æfa íþrótt í sínu félagi og í sama félagi og systkini þeirra, vinir og félagar.
Á myndinni eru þau Elfa Björk Erlingsdóttir og Hörður Reynir Þórðarson frá Stjörnunni/Öspinni og Dagur Svein Dagbjartsson frá KSÍ.
